Eskola, surfa, astronomia, zinema, familia… Lapurdi, Baxe nafarroa eta Xiberoan 40 hiztegitxo baino gehiago argitaratuak izan dira azken urteetan. Kutxa gorrietan biltzen den 7 familien bilduma, Mintzalasai elkartearen hiztegi kolokialak, Elkargoko hiztegi formalagoak… denak bildu ditugu gure Dokutekan.

Irail hasiera honetan, Mintzalasai festibalaren karietara, Neologismoen hiztegia plazaratua izan da. Etorkizunera proiektatzen diren hizkuntza guziak bezala, euskarak ere errealitate berriak izendatzeko hitz berriak asmatzen baititu. Irainen hiztegia edo ingeleskadena bezala, euskarri hori euskaratik euskarara eraikia izan da. Hots, erdaldunentzat baino gehiago, euskaldunentzat eraikia izan da.

Hizkuntza gutxitu bateko hiztun gisa, hitz berriak gureganatzea ezinbestekoa da. Horretan laguntzen gaitu material ludiko eta didaktiko horrek. Eta hiztegia teknikoa edo espezifikoa bilakatzen denean erdarara jotzeko ordez, landu ditzagun euskaraz existitzen diren hitz berri edo zaharrak.