Euskalduna izan ala oraindik ez, bere haurra euskararen jabetzean ahalik eta hobekien lagundu nahi duen gurasoak, bere beharretara egokitutako eduki ugari aurkituko ditu.
Ipar Euskal Herrian, 15.000 bat gurasok egin dute euskararen hautua 0 eta 15 urte bitarteko haurrentzat. Horretarako, erabaki dute euskara etxean transmititzea edota eskolan euskarazko irakaskuntza hautatzea.
Behar bereziak
Hautu koherentea da, baina batzuetan galdera batzuk pizten ditu: nola luzatu hizkuntzarekiko harremana eskolaz kanpo? Zergatik segitu euskaraz kolegioan eta lizeoan? Nola jokatu haurrak frantsesez ari direnean?
on.eus webguneak baliabide praktiko ugari eskaintzen dizkie gurasoei:
Artikuluak
irakaskuntza ereduak ezagutzeko, euskarazko ipuinen garrantziaz ohartzeko, euskara egunerokoan txertatzeko teknika errazak deskubritzeko, familian egiteko jarduerak aurkitzeko…
Aholku praktikoak
ohiko kezkei buruz, hala nola etxeko lanetan laguntza, hizkuntzen kudeaketa gurasoak eleaniztunak direnean, aitatxi-amatxien jarrera…
Baliabide egokituak
marrazki bizidunak, ipuinak, jokoak, musika… lotura zuzenak euskaraz une goxoak pasatzeko.
Eta gainera
euskarazko hitz orduen agenda eguneratua, eragile linguistikoen aurkitegia, lexikoak, informazio liburuxkak…
Pedagogia ariketa bat
Eduki berriak erregularki argitaratuko dira. Horretarako, arlo horretan ari diren elkarte eta instituzio publikoekin hurbiletik lan egingo dugu: guraso elkarteak, irakasleak, pedagogoak, herriko etxeak, hezkuntza aholkulariak…
Zuk ere webgunea hobetzen ahalko duzu, zure galderak pausatuz, edukiak proposatuz edo zure iritzia bidaliz. Azkenik, ON! sare sozialek tonalitate arinago batean webgune horretan lantzen duguna hedatuko dute; plataforma nagusietan atzemanen gaituzu.
Haurrak handitzen diren heinean, haien hizkuntza beharrak ere aldatuko dira. Baina aldatuko ez dena da guraso gisa betetzen duzun funtsezko rola: zure hautuen bidez, euskara haurraren ingurunean presenteago eginen duzu. Familia osoarekin bizitzeko abentura polita… eta presiorik gabe!
