Hizkuntza komunikatzeko “tresna” dela erraten dute. Kultura ere komunikatzeko modu adierazgarria da. Antzerkiarekin, istorioak oholtzaratu; musikarekin, hitzak musikatu; eta dantzarekin mugimenduan zerbait kontatu.
Pontx: euskara eta umorea oholtza gainean
Pontxekin euskara eta kultura biak elkartzen dira, eta ikusleekin partekatzen ditut eszena gainean. Joanes eta Pontxen ama-hizkuntza euskara da, eta gure bizimodua umorea da. Euskaraz egitea ez baita bakarrik zerbait eskolarra edo formala, bizimodua ere badela uste dut. Euskaraz elkarren berri hartzea, sentimenduak adieraztea, baina noski, baita irri egitea ere!
Zeinen inportantea den egunerokoan barre egitea. Gure hizkuntzarekin irri egitea, negar egitea, emozioak gora-beheran sentitzea eta ideiak jostea.
Euskarak ere badu bere umorea
Umorearen kasuan, anitzek uste dute hizkuntza batean edo bestean txisteak hobeak direla, eta euskarazkoek ez dutela eragin berdina sortzen ahal; hau da, ez direla irringarriak. Nik, ordea, kontrakoa uste dut.
Euskarak ere baditu bere baitan hitz-joko anitz, atsotitzak edo esaerak, eta nola ez, hitzen zentzu ugariak ere. Pontxek bere ikusgarrietan halaxe erabiltzen ditu oholtzan: “zozoak beleari ipurbeltz”, “usteak erdi ustel”, “ttiki, ttipi, txiki”… Gure hizkuntzan, euskaraz irri egitea posible da! Umorea anitza den bezala, gure hizkuntza ere anitza da, eta irri egiteko eta jostatzeko aukera ematen digu.
Kultura, hizkuntza eta umorea eskutik helduta
Pontx euskaraz eta umorez bizi da, baita Joanes ere. Azkenean, kultura, umorea eta hizkuntza elkarrekin eskutik helduta doazelako. Gainera, euskara ikasten ari den bati umorez euskara helaraztea baino gauza hoberik ba al dago?
Irriarekin ikusten eta ikasten dena beti da politagoa!
Pontxen umorea ezagutu nahi duzu?
