Egunean Behin 2019. urtean sortu zen mugikorrerako jolasa da, CodeSyntax enpresak garatua. Izenak dioen bezala, egunean behin erabili eta jolasteko galdera-erantzunen jokoa da. Jokoa Trivial estilokoa dela esaten da. Egunean 10 galdera erantzun behar dira, ahalik eta azkarren eta zuzenen. Izan ere, zenbat eta galdera gehiago asmatu eta zenbat eta azkarrago erantzun, orduan eta emaitza eta sailkapen hobea lortuko dira.
Jokoak asteka funtzionatzen duen lehiaketa sistema du: astelehenetik igandera jokalariek puntuak pilatzen dituzte, eta astero sailkapena berritzen da. Horrek eguneroko erronka eta motibazioa sortzen ditu, jokalariek beren burua gainditu eta aurreko asteetako emaitzak hobetzeko aukera baitute.
Euskal kultura digitalaren bultzatzailea
Jokoak sekulako arrakasta izan du Euskal Herrian, eta euskarazko kultura digitala bultzatzen duen fenomeno bihurtu da. 2019tik aurrera, jokalarien kopurua etengabe handitu da, eta 2024. urterako 50 milioi partida baino gehiago jokatu dira.
Jokoa eta lehia uztartzeaz gain, hizkuntza eta kultura ere ardatz ditu Egunean Behin jolasak. Agertzen diren 10 galderak euskaraz dira, eta horrek euskaraz jolasteko eta ikasteko aukera eskaintzen du. Galderak askotarikoak dira: batzuk Euskal Herriko testuinguruari lotuak, eta beste batzuk mundu mailako gaiei buruzkoak. Adibidez, galdera bat izan daiteke Beskoitze zein probintziatan kokatzen den erantzutea; beste bat, Mozart zein urtetan jaio zen asmatzea; edo, bestela, buruketa matematiko batzuk ebaztea.
Gainera, galdera guztiek irudi bat izaten dute, galderan idatzita dagoena errazago ulertzeko. Horrela, euskara maila ezberdina duten pertsona guztientzat erabilgarria izan daiteke. Jolasak publiko zabala du helburu: lagun artean aritzeko, ikastetxeetan erabiltzeko edota euskara ikasten ari direnek hizkuntza praktikatzeko. Izan ere, askotan taldeak sortzen dira herri, ikastetxe edo lagun-talde mailan, elkarren artean lehiatzeko eta asteko irabazlea nor den jakiteko.
Horrez gain, jokoak ohitura osasuntsu bat sortzen du: egunean minutu batzuk euskaraz irakurri, pentsatu eta erantzuteko. Ikasteko modu informal eta atsegina eskaintzen du, eta jakintza orokorra handitzeko baliabide eraginkorra da.
Nola erabili? Oso erraza da: mugikorrean “Egunean Behin” aplikazioa deskargatu (doakoa da), izena eman eta hasi jolasten. Gogoratu: egunean behin bakarrik erantzun daitezke 10 galderak.
Egunean Behin ez da soilik galdera-erantzunen jolasa; euskararen erabilera eta presentzia digitala sendotzeko tresna garrantzitsua ere bada.
