Maiatzean murgilduta gaude jada, eta uda iritsi aurretik aste batzuk falta badira ere, aurten ez dugu aspertzeko tarterik izango! Izan ere, dinamika berri eta zirraragarri bat heldu da gurera: EUSFERA (maiatzaren 7tik 17ra). Izena entzun duzu dagoeneko? Prestatu, euskararen unibertsoan barrena bidaiatzeko garaia iritsi baita!
Baina... Zer da Eusfera?
EUSFERA haurren eguneroko ingurunea euskalduntzea helburu duen egitasmo berritzailea da, bereziki 0 eta 12 urte bitarteko haurrak dituzten familiei zuzendua. Helburua argia da: euskararen presentzia eta erabilera handitzea etxean, aisialdian eta komunitatean, modu erraz, praktiko eta atsegin batean.
Familiek askotan galdetzen diote beren buruari nola txertatu euskara modu naturalagoan egunerokoan. Hori da, hain zuzen ere, EUSFERAk eskaintzen duena: tresnak, ideiak eta motibazioa, euskaraz bizitzeko urrats txiki baina esanguratsuak emateko.
Egitasmoaren bihotzean “Euskonauten bidaia” dago: parte-hartzaileak euskararen galaxian barrena murgiltzen dira, planeta desberdinak bisitatuz. Planeta bakoitzean misio txikiak aurkituko dituzte, familiaren egunerokoan euskararen erabilera sustatzeko diseinatuak. Misio horiek askotarikoak izan daitezke: etxean euskarazko jolasak probatzea, kultur ekitaldietan parte hartzea, kirol jardueretan euskarari lekua egitea edo aisialdiko ohiturak euskaraz aberastea.
Azken finean, EUSFERAk erakusten du euskaraz bizitzea ez dela erronka handi bat izan behar; abentura dibertigarri eta partekatua ere izan daitekeela.
Nola parte hartu?
EUSFERAn parte hartzea erraza da, eta familia bakoitzak bere modura egin dezake: https://eusfera.taupamugimendua.eus/gurasoen-txokoa
● Etxetik: familiek modu autonomoan osatu ditzakete proposatutako misioak, bakoitzaren erritmoa eta errealitatea errespetatuz. Ez dago presiorik; pausoz pauso, etxeko espazioan bertan euskarari presentzia handiagoa ematea da gakoa.
● Herrian: EUSPAZIO izeneko gune eta jardueren bidez, familiek herriko ekimenetan parte hartu ahal izango dute, beste familia batzuekin batera esperientziak partekatuz eta komunitate euskaldunago bat eraikiz.
Zergatik batu Eusferara?
EUSFERA ez da soilik jarduera sorta bat; komunitatea sendotzeko eta haurrei euskaraz bizitzeko aukerak zabaltzeko mugimendua ere bada. Euskara etorkizunera eramateko bidea eguneroko keinu txikietan dago, eta familia bakoitzak ekarpen handia egin dezake.
Beraz, prest al zaude euskonauta bihurtzeko? Zakua prestatu, ilusioa piztu eta batu zaitez EUSFERAra. Euskararen unibertsoan, abentura eder bat dago zure zain!
Informazio gehiago eskuratzeko
